ლაშა დეისაძე-შარვაშიძე

"ფოტოებზე თქვენ ხედავთ პანაღიას.

ამ პანაღიასთან დაკავშირებულ ძალიან სამწუხარო ფაქტს ერთი წლისა და ოთხი თვის ისტორია გააჩნია... ამ ეტაპამდე მიზანმიმართულად ვიკავებდით თავს ამ დანაშაულებრივი ფაქტის გასაჯაროებისგან. ახლა, ვფიქრობთ, რომ მოვიდა სათანადო დრო, როდესაც ეს ამბავი გასაჯაროვდეს.

ეს პანაღია უკანონოდ წაიღო ქუთათელ-გაენათელმა მიტროპოლიტმა იოანემ (გამრეკელი), რომელიც დღემდე არ უბრუნებს ამ ნივთს მფლობელებს.

ვითარება მდგომარეობს შემდეგში:

2019 წლის ივნისის დასაწყისში შევუკვეთეთ პანაღიის დამზადება ბაგრატის საკათედრო ტაძარში მოღვაწე ერთ-ერთ ბერს. პანაღიის საჩუქრად გადაცემა განზრახული გვქონდა ჭყონდიდელი მიტროპოლიტის პეტრესათვის (ცაავა), 2020 წლის 7 აპრილს, ხარების დღესასწაულზე, მეუფე პეტრესთვის დაბადებიდან 50 წლის იუბილის მისალოცად. პანაღიის დამზადებისა და შეკვეთის მიცემისა და მეუფე პეტრესთვის საიუბილეო თარიღზე საჩუქრად გადაცემის იდეა ეკუთვნის გურამ მოდებაძეს და ასევე, პანაღიის დამზადების შემკვეთთაგან და მეუფე პეტრესთვის ამ საჩუქრის მომავალ გადამცემთაგან ერთ-ერთი გახლავართ მე - ლაშა დეისაძე-შარვაშიძე. შეკვეთის დროისათვის, მიტროპოლიტი პეტრე გახლდათ ჭყონდიდის კათედრაზე და არ ჰქონდა აკრძალული მღვდელმოქმედება. ასევე, იმ პერიოდისთვის, ქუთაის-გაენათის კათედრაზე იმყოფებოდა მიტროპოლიტი კალისტრატე (მარგალიტაშვილი).

პანაღია მზად უნდა ყოფილიყო 2020 წლის 7 აპრილისთვის, მიტროპოლიტ პეტრეს დაბადებიდან 50 წლის საიუბილეოდ. ოსტატს, რომელიც არის ბერი, გადავეცით თანხის ნაწილი და ასევე მასალის გარკვეული ნაწილი. დაიწყო პანაღიის მომზადება... ამის შემდგომ მოხდა, ის, რომ 2019 წლის 31 ოქტომბერს მიტროპოლიტ პეტრეს აუკრძალეს მღვდელმოქმედება და გამოიყვანეს წმიდა სინოდის შემადგენლობიდან. შეკვეთის მიმღებმა ოსტატმა ბერმა გვკითხა, ამ ფაქტის შემდეგ, თუ კვლავ გვსურდა პანაღიის დამზადების გაგრძელება, რაზეც ჩვენ განვუცხადეთ თანხმობა და მეუფე პეტრესთვის მღვდელმოქმედების აკრძალვის შემდეგ, ხსენებულ ბერს გადავეცით თანხის დარჩენილი ნაწილი და მან ჩვენი თხოვნითა და თავისი თანხმობით გააგრძელა მიღებული შეკვეთის დამზადება (მიტროპოლიტი პეტრე იმყოფება მღვდელმთავრის ხარისხში, მას აკრძალული აქვს მღვდელმოქმედება, მაგრამ არ არის განკვეთილი ხარისხიდან, შესაბამისად, მას, როგორც მღვდელმთავრის ხარისხში მყოფს გააჩნია უფლება, რომ ატაროს სამღვდელმთავრო პანაღია).

მოგეხსენებათ, 2019 წლის 31 ოქტომბერს ქუთაის-გაენათის ეპარქიის მმართველად დადგინდა მიტროპოლიტი იოანე. 2020 წლის მარტიდან საქართველოში დაიწყო კორონავირუსული პანდემია, რის გამოც, გარკვეული ხელისშემშლელი მიზეზებიდან გამომდინარე, ვერ მოესწრო ხსენებული პანაღიის დასრულება 2020 წლის 7 აპრილისთვის და ჩვენი თანხმობით შეკვეთის მიმღებმა გააგრძელა დამზადება და შევთანხმდით, რომ 2020 წლის ზაფხულის პირველ ნახევარში გადმოგვცემდა ჩვენს კუთვნილ პანაღიას. მართლაც, დამზადდა პანაღია (ვერცხლი, მინანქარი, პანაღიას აქვს ვერცხლის ჯაჭვი) და როდესაც დადგა ჩვენი კუთვნილი ნივთის გადმოცემის დრო, შეკვეთის მიმღებმა ბერმა განგვიცხადა, რომ მიტროპოლიტმა იოანემ მფლობელების დაუკითხავად წაიღო ხსენებული პანაღია, რაც ჩვენთვის იყო სრული მოულოდნელობა. მიზეზი გახლდათ ის, რომ მეუფე პეტრეს აკრძალული აქვს მღვდელმოქმედება და თითქოს, ამიტომ, მეუფე იოანე ვერ დაუშვებდა მეუფე პეტრესთვის საჩუქრად გადაცემულიყო ეს პანაღია.

პანაღიის შემკვეთებს სრული შემადგენლობით გვსურდა მიტროპოლიტ იოანესთან შეხვედრა, თუმცა, მის რეზიდენციასთან მისულებს, ერთ-ერთი მონაზვნის მეშვეობით შემოგვითვალა, რომ ახლა ვერ მიგიღებთო და არც სრულად შემკვეთებს შეგვხვდებოდა, არამედ კონკრეტულად მხოლოდ მე (ლაშა დეისაძე-შარვაშიძეს) შემხვდებოდა უახლოეს დღეებში.

შემდგომ ამ ფაქტთან დაკავშირებით მიტროპოლიტ იოანესა და ჩემს შორის შედგა ორი შეხვედრა. პირველი - 2020 წლის ივნისში, მეორე - 2021 წლის 20 ივნისს. ორივე შეხვედრის შესახებ საქმის კურსში და ინფორმირებული იყო პანაღიის დამზადების იდეის ავტორი, გურამ მოდებაძე და ორივე შეხვედრისას მე ვსაუბრობდი როგორც ჩემი, ასევე მისი (გურამ მოდებაძის) სახელით. მიტროპოლიტმა იოანემ პირველივე შეხვედრაზე განმიცხადა, რომ დიახ, ჩვენი კუთვნილი ნივთი - პანაღია არის მასთან და არ დაგვიბრუნებს ჩვენს ნივთს ანუ პანაღიას, თუ მიტროპოლიტ პეტრეს არ აღუდგება მღვდელმოქმედება. როგორც მეუფე იოანემ მითხრა, აღნიშნული პანაღია წავიღეო კათოლიკოს-პატრიარქ ილია მეორესთან და მოვახსენე საქმის ვითარებაო და პატრიარქმა მითხრაო, რომ ეს პანაღია არც ჩემიაო და არც შენიო, მაგრამ შენთან (მეუფე იოანესთან) იყოს ეს პანაღია და შეინახე შენთან მანამ, სანამ მეუფე პეტრეს აღუდგება მღვდელმოქმედებაო. ჩემი მხრივ, მე ავუხსენი მეუფე იოანეს, რომ მეუფე პეტრემ არც კი იცოდა ამ პანაღიის შეკვეთის შესახებ და ხსენებული ნივთის მფლობელები ვართ მისი შემკვეთები და ეს შეკვეთა იყო კერძო სახის და არავითარ ოფიციალურ კავშირსა და შემხებლობაში - ქუთაის-გაენათის ეპარქიასთან და ვთხოვე, დაებრუნებინა ნივთი მისი მფლობელებისთვის. მიტროპოლიტმა იოანემ განაცხადა, რომ ის ვერ დაუშვებდა პროვოკაციას, რომ ქუთაისში და ბაგრატის ტაძრის ბერის მიერ დამზადებული პანაღია გადაეცათ მეუფე პეტრესთვის საჩუქრად. სანაცვლოდ, მიტროპოლიტმა იოანემ შემოგვთავაზა ნივთის დამზადებაში გადახდილი თანხის უკან დაბრუნება, რაზეც ჩვენ უარი განვაცხადეთ და მოვითხოვეთ ჩვენი კუთვნილი ნივთი და არა თანხა.

ამის შემდგომ, 2020 წლის 16 აგვისტოს, ბაგრატის ტაძრის ერთ-ერთ სატრაპეზოში, სხვათა თანდასწრებით შედგა შეხვედრა მიტროპოლიტ იოანესა და გურამ მოდებაძეს შორის, რომელსაც მეუფე იოანემ ძალიან ბუნდოვანი მოსაზრებებით უარი განუცხადა ჩვენი პანაღიის დაბრუნებაზე.

ერთი წლის შემდგომ, 2021 წლის 20 ივნისს, მიტროპოლიტმა იოანემ დამიბარა შეხვედრაზე თავის რეზიდენციაში და საუბარი შედგა კვლავ ჩვენი პანაღიის შესახებ, რომელიც დღემდე უკანონოდ იმყოფება მასთან. მეუფე იოანემ კვლავ შემომთავაზა რამდენიმეგზის, რომ გადმოგვცემდა თანხას, რომელიც პანაღიის დამზადებაში გადავიხადეთ. კატეგორიული უარის შემდგომ მეუფე იოანეს მხრიდან იყო იქვე შემოთავაზება, რომ ჩვენს მიერ გადახდილი თანხის რაოდენობის ორჯერ მეტ თანხასაც დაგვიბრუნებდა, ოღონდ საერთოდ დაგვევიწყებინა ეს პანაღია. რასაკვირველია, ამაზეც კატეგორიული უარი მიიღო მიტროპოლიტმა იოანემ და ამის შემდგომ, ისიც კი მითხრა, რომ მაშინ მე მაჩუქეთო... ამაზე მხოლოდ გამეღიმა. საუბრის დასასრულს, როდესაც მეუფე იოანე ვერ გახდა ვერაფერს თანხის დაბრუნების მხრივ, ვინაიდან გადახდილი თანხა მხოლოდ ჩემი არაა და ერთად გვეკუთვნის იმ პირებს, რომლებმაც შევუკვეთეთ პანაღია, მღვდელმთავარმა იოანემ ასეთი რამ მითხრა - "თუ მთლიანი თანხა ვერ მიგაქვს, შენი წილი მაინც წაიღე, ახლავე მოგცემ", რაზეც მე ასეთი პასუხი გავეცი პირდაპირ, მეუფე, მე რომ ახლა ჩემი წილი თანხა ავიღო, ეს იქნება ჩემი მხრიდან იუდას მიერ ოცდაათი ვერცხლის აღება-თქო (დიალოგის ამ უკანასკნელი ნაწილის მოწმეა ერთ-ერთი დეკანოზი) და დავტოვე ეს შეხვედრა და წამოვედი.

შესაბამისად, ჩვენი კუთვნილი ნივთი - პანაღია დღემდე არის უკანონოდ წაღებული მიტროპოლიტ იოანეს მიერ. გარდა საეკლესიო უწმიდეს კანონთა დარღვევისა, ასევე, ეს საქმე შეიცავს სისხლის სამართლის დანაშაულის ნიშნებს და ხსენებული საქმის ამ მხრივ განვითარებისკენ ჯერჯერობით ვიკავებთ თავს.

გამომდინარე იქედან, რომ რამდენიმეგზის პირადმა თხოვნამ მიტროპოლიტ იოანესადმი შედეგი ვერ გამოიღო დღემდე, ახლა უკვე საჯაროდ ვთხოვთ და მოვუწოდებთ მას - დაგვიბრუნოს ჩვენი ნივთი!"

წერს ისტორიის დოქტორი, თეოლოგიის მაგისტრი, პოლიტოლოგიის მაგისტრი ლაშა დეისაძე-შარვაშიძე.