Zura Odilavadze

ღმერთი, რომელიც დაგვიმალეს...

"ბოროტმა ადამიანებმა მოგვატყუეს, ღმერთი საკუთარ თავზე მოირგეს და შეგვიცვალეს...

ღატაკთა და უპოვართა ღმერთი – მდიდართა მფარველად და ელიტარულ ოქროს ხბოდ გამოაცხადეს;

დევნილთა, პატიმართა, ჩაგრულთა, მწუხარეთა და სნეულთა ღმერთი – ფუფუნებისა და კეთილდღეობის კერპად დაგვიდგინეს;

გლახაკთა და უძლურთა შემწე – ძლიერთა ამა ქვეყნისა და მმართველთა მფარველად თარგმნეს;

უბრალო ხალხისა და ფერხთბანის ღმერთი – უპრინციპო პოლიტიკოსების საკუთრებად გადააქციეს;

ცოდვების გამო მონანულთა სანუგეშოდ მოსული იესო – მუდამ და ყველაფერში „მართალთა“, „უცოდველთა“ და სხვაზე უპირატესობის მოპოვების, ანუ ზიზღისა და „მტრის ხატთან“ მებრძოლ მონსტრად გადაასხვაფერეს;

თავმდაბალთა და მორჩილთა, ღვთის ნებისადმი მინდობის ღმერთი – ბაბილონური თავნებობისა და „ყველაფერი მოსულას“, ამპარტავნებისა და მედიდურობის ქომაგად გარდაქმნეს;

განსაცდელისა და ტკივილის მორჩილებით დამთმენთა მკურნალი იესო – ამქვეყნიური ბედნიერებისა და განცხრომის ღმერთამდე დაიყვანეს;

მონანიე დაცემულთა და მოტირალ დაკარგულთა გამო გახარებული ზეცა – მიწიერი ცხოვრებით ტკბობის სავანედ გადააკეთეს;

უშიშართა, სხვისთვის თავგანწირულთა ღმერთი, ადამიანთა ცოდვების გამოსასყიდად ჯვაცმული იესო – მხდალთა, საკუთარი თავით ტკბობისა და ნარცისთა ღვთაებად შეცვალეს;

ერთი დაკარგული ცხვრის, ე.ი. ინდივიდუალიზმის ღმერთი – ცხვრების ფარის, კოლექტივისა და უმრავლესობის ნების მბრძანებლად შემოგვტენეს;

მსოფლიო მოქალაქეთა ღმერთი – შოვინიზმისა და ყალბი პატრიოტიზმის მქადაგებლად განმარტეს;

დღევანდელი დღით მცხოვრებთა ღმერთი – სიმდიდრის დაგროვების ყულაბად გამოთალეს;

საუკუნო ცხოვრებისა და სულის უკვდავების მომნიჭებელი – მატერიალურ სამყაროსთან მიჯაჭვულობისა და დაბადებიდან მკვდართა მფარველად მოგვაჩვენეს;

იესო, რომელიც სიკეთეა და სიყვარული – დაუნდობლობის, სიძულვილისა და ომის წინამძღოლად გამოაცხადეს;

გულის სითბო – გულქვაობასა და ცივსისხლიანობამდე დამახინჯდა;

ცხვრების მფარველი – მგლების ხროვის წინამძღოლი გახადეს;

სამყაროს შემოქმედი და თავისუფალი ნების მწყალობელი – გაქვავებული დოგმებისა და წეს-ჩვეულებების აღსრულების თვითმპყრობელად...

ქედმაღალმა ბატონებმა ღმერთი შეცვალეს და საკუთარ თავზე მოირგეს...

მათ „ჯიბის ღმერთი“ გამოაქანდაკეს, ფულით მოისყიდეს, პირფერობით მოატყუეს, მიისაკუთრეს და საკუთარი ბოროტი ზრახვებისა თუ ვნებების სამსახურში ჩააყენეს...

იმედის ღმერთი – ოცნების მირაჟად გადააქციეს...

ამაყმა არარაოებმა ღმერთი დაგვიმალეს – ადამიანებმაც ჭეშმარიტების გზა დაივიწყეს და სიცრუე შეიყვარეს, ხალხმა ნუგეშისმცემელი უარყო და სასოწარკვეთას მიეცა..."

ზურა ოდილავაძე.

 2021, სექტემბერი